لا شفت صدرك من كثر ضيقته مل = وقامت تراقص وسط راسك شياطين
جهز جوازك والشناط وتسهل = البخل ما يمدح يدين البخيلين
وامش العصير وتبع الموتر الظل = تطلع عليك الشمس في ديرة حسين
نوخ ركابك عند ناس المتبل = واطلب حميصه من مطيعم فلسطين
وعمان حطه في يسارك وكمل = بس انتبه خطك ترى يصير خطين
وان جيت درعا لا تفيهم تبهذل = عطهم تراهم اهل جود وكريمين
وعلى يسارك سوق في مدخله زل = لازم تمره لا تخليه بعدين
تلقى لكيف الراس شين مشكل = هذا احمر وهذا اصفر وذاك لونين
منهم تزهب بالزهاب المكمل = لا تنقطع وتصير مثل المجانين
وليا دخلت الشام لك دربن يدل = دور على المدعوم خل الضعيفين
اضبط امورك واحلق وحط لك جل = والبس وسيده لا يسارن ولا يمين
على طريق التل تل الخطا تل = دور على جو(ن) يسر المحازين
ترقى سما سما سما لين توصل = يم الثريا والقمر والميازين
وعلى بلاط البست شين يهول = ضباط هتلر يوم تقسيم برلين
شقر البنات اللي زها زينهن دل = طول عنق ارقاب رووس الشياهين
هذي تلاعب شعرها واتمايل = وهذي تناظر بك وتسالك من وين
وهذي حكيها من شفاها تسايل = ومن الغنج تحول الشين للسين
واحرص على جو الخوي لا يتبدل = خله على جوه وصيروا حبيبين
وليا سريت الصبح من طلعة التل = مابين برزه والتجاره وتشرين
سير لام حجاج من الصبح منهل = وعط العجوز شوي وارض البزارين
وليا وصلت لديرتك كبر وصل = كل الخلايق بالذنوب متساوين

الله يهديه بس ..

عز الله انه ما نصح

يعطيك الف عافيه يا صافي ..