::منتدى الجبلان الرسمي:: - انتبه باقي على شفتك روج !!!!

--------------------------------------------------------------------------------

ياعين من حطيت عيني بعينه == وابطيت واقف في بحر عينه أموج

ابحرت في عينه بليا .. سفينه == سجيت فيها لين ضيعني الموج

حاولت .. الد الشوف عما يهينه == ولا انتبهت الا وانا فيه ملبوج

شفت الفتن في ملتقى حاجبينه == السحر في عينه مع الزين مدموج

اسود سواده لابسته السكينه == وابيض بياضه طايش اللون مرجوج

زاويه طرف ٍ حاجز ٍ دمعتينه == لولاه كان الخد بالكحل ممزوج

كاسيه رمش ٍ زاد ملحه وزينه == من فوق متكحل ومن تحت مدعوج

بين الرموش السود شفت الغبينه == واللي رماه الرمش ماعاد له بوج

مرت ثواني من حياتي ثمينه == وانا اتهادى بين الاشواق وأدوج

مرت وانا قابض على راحتينه == واقف مقابل له وساهي ومدلوج

مدري وش اللي صار بيني وبينه == والقلب ماردنه ضلوعي العوج

ولا انتبهت الا بسحبت يدينه == قال انت تبغى الناس تلحقني هروج

قلت اعذر اللي شافك الله يعينه == يبطي ودمعه بعد فرقاك مزعوج

عينك بنظرات الغلا مستهينه ؟؟ == قال الغلا في داخل القلب منسوج

قلت الوعد قال ايه .. كل شيء بحينه == الله يفتح لك من الضيقة فجوج

قلت آآآه .. طيب شف لي الدرب وينه == قال انتبه باقي على شفتك روج