رفعت كفي ماقدرت ارفع الصوت !!]

رفعت كفي .. ماقدرت ارفـع الصـوت

لـو كـان فالخاطـر .. كـلام ٍ كتمتـه

لحظـه وداع / وكنهـا سكـرة المـوت

ضاع الطريق .. اللي مـن اول رسمتـه

ضاع الطريق وصرت في الدرب مبهوت

مدري وش اللي فاتنـي مـا اغتنمتـه !

العمر مرّ .. وراح مـع فايـت الفـوت

صحيح ضعت .. وضاع حلـم ٍ حلمتـه

الا انت ياللي قربـك لروحـي القـوت

لو غبت / يبقى وسمـك اللـي وسمتـه

يبقى كما نقش ٍ على الصخـر منحـوت

حفظتـه .. بشكلـه ولونـه وسمـتّـه

مهما الفـراق اوجـاع والبعـد ممقـوت

اصبح مصير ٍ من غـلاك / احترمتـه

دمع النصر لو طاح من ( عين جالوت )

( عين العقل ) دمـع ٍ تكنّـه / حشمتـه

ذخرت لك يافرحـة العمـر .. تابـوت

فيـه الغـرام اللـي بديتـه / ختمـتـه

يبقى الغصن لو مابقى فالغصـن تـوت

تحـرك انسـام الذعاذيـع .. صمـتـه

سكّت .. وانـا مـن موادعـك مكبـوت

شـي ٍ تجاهلتـه .. وشـي ٍ فهمـتـه !

حبل الرجاء من جـور الايـام مفلـوت

ياليـت قلبـي عـن غرامـك عصمتـه

ياما .. بنيت بيـوت وبيـوت وبيـوت

اليوم .. كـم بيـت ٍ بنيتـه .. هدمتـه


وسلامتــكم

الموضوع الأصلي: رفعت كفي ماقدرت ارفع الصوت !!] || الكاتب: بندر بن دبي || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::