يا ما حلى الفنجان بحضور الأصحاب = في مجلس والكل شره على الطيـب
في مجلس ما به تفاريـق وأحـزاب = هذا ولد عمك وهـذا لـك اصحيـب
ربع ليامنه غشى الزمـل ضبضـاب = قطاعة الفرجه على الفطـر الشيـب
ضياغـم لامـن بـدا حـزم كـلاب = مركاضهم يشبع به الطيـر والذيـب
لا حولوا لعيـون وضـاح الأنيـاب = الكـل منهـم وافـيـاً بالتجـاريـب
ما حسِّبوا لمصرف القـول بحسـاب = اللـي مراجلهـم بشـذب العراقيـب
يتلون أبوهايـف ليـا كلّـح النـاب = هـو درعنـا لا غيّصـن الكلاليـب
لنـا كمـا عنتـر وأبازيـد وذيـاب = نبـا نماريبـه جميـع الأجانـيـب
وشيخ بلا عانه ترى مالـه حسـاب = وقـوم بليـا شيـخ فيهـم عذاريـب
والبيت ما ينفع بلا أوتـاد واطنـاب = ولا يقضب المحـزم بليـا مقاضـب
يا هن يا اللي توصل العلـم بكتـاب = اذكر سلامي عند هـاك الأصاحيـب
لطامة العايل ليا مـا الـردي هـاب = ما هم من اللي هوشهـم بالمغاريـب
يا لايمـي لعـل ترمـى بالأسبـاب = ترميك خطـلان العيـال المعاطيـب
من لامني في حبهم جعلـه إيصـاب = في حب ربـع ينطحـون المواجيـب
لا حولوا بنحـور دقـلات الأجنـاب = توادعوا مـا عـاد عنهـا تجانيـب
تحاولوا فـي سهلـة ماحـدٍ غـاب = والمنع يرفـع ماحـدٍ لـه مطاليـب
والشيخ طاح وعديَّة عنـه الاقـراب = وقامت ترادي سابقه عقب ما صيـب
من أيمان ربعي طاح فكاك الأنشـاب = فكاك بالضيقـات زمـل الرعابيـب
صاحوا عليهم لابتي والسعـد طـاب = احد ذبيـح ومنهـم احـد مصاويـب
هذا وصلى الله على سيـد الأحبـاب = على النبي ما خط حـرف المكاتيـب

الموضوع الأصلي: يا ما حلى الفنجان بحضور الأصحاب || الكاتب: الفغم || المصدر: منتدى الجبلان الرسمي

المصدر: ::منتدى الجبلان الرسمي::