ان طاب طيبك من خوالك,,,,,,,,,,,,,,,,,,,,,,,
ان طاب طيبك من خوالك,,,,,,,,,,,,,,,,,,,,,,, ابن الذيب هو الشاعر راشد بن محمد العجمي
ابو الشاعر ابن الذيب الي طلع في شاعر المليون
مناسبة قصيدته هذي انه كان يعمل في ارامكو
ويوصل الطرقيه اللي في طريقه
وقد حذرته الشركه من استعمال سيارة الشركه للتحميل
وكانو يظنون انه يكد عليها وهو في الحقيقه راعي جميله
المهم جاء يوم ولقى عجوز على الطريق ووقف لها
وقالها اطلعي بسرعه . لكن هي معها حلال (غنم)
قالها مااقدر اطلع غنمك انا مستعجل
عاد قالت له العجوز روح الحين يجيني ابن الذيب يوصلنى
وهي ماتعرفه ..............
بعدها قال
قالها إبن الذيب من هاجوس باله ...كلمة(ن) يلعب بها والبال زينـي
قالها يومه طرالـه مـا طرالـه ....من هواجيسٍ تشيب المرضعينـي
غرّني بعض الرجال بكثـر مالـه ...مادرى إن الموت في حبل الوتيني
كيف ينفعني وبعض الناس خاله ...ما يقوم البيت دام الساس طينـي
ماش وين اللي عوايده الشكالـه ....مثل إبن ظافر حمد ليته يجينـي
الثنا والجود دايـم فـي خيالـه ....علّمه ظافـر سلـوم الطيّبينـي
جـوّد العليـا ولزّمهـا عيالـه ....وأدركوا من علمته دنيا ودينـي
واهني من باع حظّـه وإشترالـه ...سار في درب النبي وأخزا اللعيني
موقفـه ماكـل رجّـالٍ ينـالـه ...ومن بغا ممشاه يقعـد مرّتينـي
وكم ذبح من حايلٍ من حر مالـه ...وعادته لطمة خشـوم لعايلينـي
حالفٍ ماخذ على الطرقي ريالـه ....وبالثلاث محرّم إنها مـا تجينـي
لا لقيت اللي على السكّه لحالـه ...يلتفت ويقول : وين المستحينـي
أوقف الموتر حيا وأبغا الجمالـه ...يوم ولد اللاش وجهه ما يلينـي
والطمع في كرّوة الرجلي رذالـه ...خصّ به وإن جا مجال الغانميني
والردي في حالةٍ ماهيـب حالـه ....يا عوينه مـن كـلام الطيّبينـي
الولد وان طاب طيبه من خوالـه ...بالخوال يسـال قبـل الوالدينـي
وأركبه لعيون مـن زيـنٍ دلالـه ...ما تحاكوا في قفـاه الرامسينـي
ما بغى غيري وأنا مابغـا بدالـه ....قاعدٍ لي بالرجـا مـدّة سنينـي
ما قعدنا فالعمـل نبغـا الرزالـه ....ناخذ العليـا طريـق الفايزينـي
وأشرب الفنجال وأكـب البيالـه ....تابـعٍ سلمـي سلـوم الأولينـي
الموضوع الأصلي: ان طاب طيبك من خوالك,,,,,,,,,,,,,,,,,,,,,,, || الكاتب: دمعة ناقة || المصدر: منتدى الجبلان الرسمي
|
|
تعليقاتكم البناءه هي طريقنا لتقديم خدمات افضل فلا تبخل علينا بتعليق |
|
|
|