ياطير ياللي تبعد الحوم ياطير=قرب واخذ مني رساله لنايف
واحذر تقصر ياخوي المناعير=وصل وصاتي وانت للحال شايف
منصاك ابوطفره ولاتنص احد غير=اللي عن الميلات والهزل نايف
الشاعر اللي يصخر القاف تصخير=شرد القوافي عند نايف ولايف
تشهد على قولي جميع الجماهير=الاسم نايف وايضا القاف كايف
ونص الرساله يازبون المخاسير=وش قولتك وانت تحب الطرايف
فسر ترى الموضوع يحتاج تفسير=واضن مافيها عليكم كلايف
اللي يشيرك بامر لابد وتشير=نصيحه الصادق ذرا كل خايف
موضوعنا مافيه عشق وغنادير=ولاذبحني حب زين الوصايف
اشوف انا العالم حصل فيه تغير=وكلن على شعر الحداثه مهايف
والشعب نصه راح يبدع اصاطير=تسعين بالميه من الشعب هايف
موقف حصل من واحدن توه اصغير=جاني يقول اسمع وانا استار فايف
وسمعتلي قافن به العاقل يحير=لاوزن لابه قاف لابه وضايف
قلت انت شاعر قال سيد الشواعير=قلت الحسايف ماتفيد الحسايف
ياللي نفخت الكير كثر من الكير=لاتعترض دربي واجيك متهايف
اسمع كلامي زين ابعطيك تحذير=السيف جود مقضبه ثم سايف
وشعر الحداثه حسب رايي دعاثير=وشعر النبط راقي بكل النوايف
رايي وراي المجتمع في زمهرير=وش راي نايف بالحداثه يانايف !!

رد نايف ابو طفره .. يقول ...................

يامرحبا اعداد وبل الشخاتير=واعداد من فالبيت ساعي وطايف
يامرحبا يابن الرجال المشاهير=من خاطرن ماهو للأجواد عايف
احب طلقيين الوجيه المسافير=حب الوفا ماهو بحب الخرايف
انتم سوات اطويق يابدر والنير=امجادكم تشهد وسبع الطوايف
على النقا ومعسكرات المسامير=وعلى ظهور ملافخات السفايف
اعيال عودن يتعب الهجن بالسير=يوم القبايل بين سبر ونكايف
انتم هل الوقفات والشر والخير=ستر البني مرودعات الشفايف
عسى ديركم للمزون المزابير=امن النفود لديره الشيخ هايف
السيل يرهج سهلها والعثامير=حتى يشرع جوها بالحتايف
ويملا فياض الصلب يابدر وزعير=الفيضه العوده وكل الردايف
مدة الاه الملك وال التدابير=عقب الدهور وعقب وقت الكسايف
ويزين حال مراوزات المقاهير=ترعى نبات الصلب عقب العلايف
ويزين نقل مصخرات المعاشير=كل اشقرن لاثبت الجول ضايف
والشعر يطرق والنشاما مسايير=شعر النبط ماهو بشعر العذايف
ماصاغه الجاهل ردي التفاكير=اللي جماهيره ادفوش وهدايف
ناسن على الهزله تفك الحناجير=وعقولهم يادبرة الله خفايف
انا ضعوني عن سلفهم مدابير=يابدر ماني مع طرفهم مسايف
الشعر له عندي معزه وتقدير=صادق ولاجيته بدرب اللفايف
اقدره واحماه عن كل شرير=واجامل العالم بضحك الرهايف
وان شفت خطو اللي يدق المزامير=اقول جعله في طريقه ذلايف

الموضوع الأصلي: بدر بن صاهود ابن لامي .. ونايف ابو طفره || الكاتب: سعود بن لامي || المصدر: منتدى الجبلان الرسمي

المصدر: ::منتدى الجبلان الرسمي::