اسعد الله اوقاتكم بكل خير


هذي القصيده طلب من اخوي راع المغاتير

اتمنى لها القبول



(ساعة الذكريات)

يا بحر لك من الهاجس سلام وتحيه=عد ماهز نسناسك شجون الهواوي
وإن تسائلت عن حالي وما صار ليه=والله إني إلى هالحين قلبي شقاوي
ضايق الصدر وهمومي توارد عليّه=مثل ورد الظوامي فوق عدٍ رهاوي
الضماير من جروح الليالي مليّه=والطواري من الأيام سيلٍ نحاوي
جيتك يسوقني شوق العيون الشقيّه=آتمشى مع العالم وكني خلاوي
يا بحر عندك أسرار العلوم الخفيّه=يم شاطيك طاويني من الهم طاوي
إيه أحبك وأحب الديره الساحليّه=لأجل ذكرى الليال الغاليه جيت ضاوي
ذكرها أحلى شعور وجرحها أغلا هديّه=لا اجمل العمر ترجع بي وما كان حاوي
ماضي العمر غير وخير ما فيه ضيّه=ضيّه اللي على المعلوق نجمٍ سماوي
سلوتي فيه عشق وعشقي أكبرخطيّه=لآن الأطلال والذكرى كدر كل هاوي
ساعة الذكريات أخطر من البندقيّه=تخلف الراي لو إنك من العقل راوي
تدرج الفكر للماضي خليّه خليّه=يعرف أبعادها قلبٍ من الشوق ذاوي
الهوى صدفته تبني صروحٍ قويّه=والغلا يبتدي نظره ويثّر بلاوي
هكذا الحال من ماض العصور المديّه=ما تهيد الجروح ولا تفيد الرجاوي
آه وآقلبي اللي ما بقى له بقيّه=من يقول القلوب إلها المحاني عراوي
كم قلوبٍ غدت مدري خذتها البغيّه=مثل ما راح قلبي مع بعيد الخطاوي
البعيد القريب اللي جروحه نديّه=اللطيف العفيف المستخيف السحاوي
فيه لشعر ذوق ومنه لشوق كيّه=كيةٍ خافيه مافاد فيها المداوي
لويطول الفراق أشواق الاعماق حيّه=ما تطيب الطعون ولا تخيب الهقاوي
آتعمّق طيوفه وآتشفّق مجيّه=وأدري إنه على ما فات ما له حراوي
ليت من يعرف أخباره وداره وحيّه=ويخبره عني إني للمواصل شفاوي
ليه ما تنزل الدمعه ولا أصفق يديّه=كم لي أصبر وأنا ماني على الصبر قاوي
لا تقولون مالك حق ولا خطيّه=إتركوني مع الذكرى والأحلام غاوي
الحياة البسيطه والحياة الغنيّه=دون راحت ضمير الآدمي وش تساوي..؟

الموضوع الأصلي: (سـاعـة الـذكريات) || الكاتب: راشد العازمي || المصدر: منتدى الجبلان الرسمي

المصدر: ::منتدى الجبلان الرسمي::