كل ماقربت ديرة فهد فز بالي =واوجس القلب يرجف تقل جا فيه روعي
اشهد اني من الفرحه تقلص خيالي = والبلاغه تخلت واسعفتني دموعي
عبرت عن عظيم الحب واهملالي= كيف تقدر تعبر عن حنايا ظلوعي
مالقيته غريب وشفت عذري لحالي = اصلنا واصلن والفرع لاصله تبوعي
والله اني من الفرقا سهرت الليلالي = كيف نبعد وحنّا يالازيمع ربوعي
المحبه كبيره راسيه كالجبالي = من نكر حبكم ياعل ماله شفوعي
يافهد ياعضيدي ياخلف ماغدا لي = خل حبل المواصل لايجي به قطوعي
ياولد مطلق الغالي وياراس مالي = ليت شمل الحموله يلتئم بالجموعي
خلنا نجتمع والعمر خيرته بالي = من طلب وصل دمه مايسمى قطوعي
ليت تذكر حمد كان تعذر مابدا لي = بالمحبه رصيدك دايمن بالطلوعي
يذكر اسمك اليا ذكرت اعلوم الرجالي = وينتخي فيه لاصالت عليه الفزوعي
ساسنا بالمحبه يوم حنا عيالي = واثمر البذر فينا حبنا للفروعي

ياهلا مرحبا باللي تعنّا وجالي = عد وبل السحاب وعد نبت الزروعي
اسعد ايامنا واسعد جميع الليالي = لحظة شفت نايف مشكلته الرجوعي
يوم جانا وشفته كربة الهم زالي = نحمد اللي جلب لي واحدن من دروعي
اتقي به وافاخر به رجالن دوالي = لاحصل ساعتن تزمل خطاة البتوعي
نور عيني بشوفه طاب حلو الكرى لي = سال وادي محبتنا وحنا هجوعي
هو سنا ضوح برّاقه صدق بالخيالي = القلوب ارتوت ماصار سيله نقوعي
يا الله اني طلبتك ياعزيز الجلالي = رافعن لك يديني في نهاية خشوعي
حقق امالنا في مجتمع كل غالي = وان حصل ما اتمنى قلت قبل السبوعي
لاذكرنا حمد يا بو الوليد استشالي = قلبنا له كفخ نومي على راس كوعي