حييت يا طيفٍ على بالنا جيت=حييت يا طيف به أوصاف خلي
طيفٍ يسامرني مع الليل لمسيت=حييت يا طيف الذي ما يملي
في حضرتك يا طيف لم التشاتيت=والقلب من خلف المحاني يهلي
وقفت أحيي طلتك يوم طليت=جيتك وأنا بك مغرم جيت كلي
لك وحشةٍ بالفكر لا غبت واقفيت=والدمع من محجر عيوني يهلي
ما شفتني في غيبتك كنني ميت=لا خاطر طيب ولا مسفهلي
ياللي تذكرني هنوفٍ لها صيت=بوصوفها وصف عظيم يسلي
عذروبها فيها الكبر باني بيت=فيها الكبر يفرض عليها التغلي
لو رشحوا للزين فاق التصاويت=تلقى جمال الكون فيها امتعلي
يا طيف أنا افرح في مسامرك لا جيت=دامك شبيهٍ تشبه أوصاف خلي

الموضوع الأصلي: يــاطـــيــــــف || الكاتب: بعيد الهقاوي || المصدر: منتدى الجبلان الرسمي

المصدر: ::منتدى الجبلان الرسمي::