يالله تخارجني من الناقص ومن فعلة يده=إليا إعترض لي مع صواديف الزمن ، وليالها
الخاين ، أللي في رفيقه فاعلٍ فعل إجحده=باع ، الكرامة بالردى ، خاسر لعزة حالها
فعله ردي ، إمنزلٍ قدره و وجهه سوّده=عينه ، وهو قدم الرجال ، تنظر لماطى إنعالها
باع الخوي ، خان العهد ، لا تامنه ، لا تنشده=طبعه ردي ، كله ردي ، أردى الرخوم ، إحثالها
سلك الحرير ! ، أللي سحر عقله ، مَحكّم بإعقده=إسمه ، سحر كل الرخوم ، إليا عقد بإحبالها
أقولها : وألي رفع سبعٍ بليا أعمده=كل من فعل له كارثه ، يبي يجي يشتالها
أللي ، هبدها بالردى ، يلقى النتيجة ، موحده=يمناي ، بتحاسب فعوله ، دقها وإجلالها
وإليا إنتهيت ، إمصفي إحساباتي ، أرجع وأجرده=من زود حرصي ، ولا هو نفسه أهنت إذلالها
الوقت ، يكشف أقنعه ، كانت دنيه ملّبده=تلبد ، ورى ضعف النفوس ، أو لا تعدى جالها
يا خايب ، إستح ، وإعتدل ، ترى القرار إمعمده=قرار فصلك ، معتمد ، والنفس حفظ إجلالها
وش لي بخوة ، خايبٍ نفسه ذليله ، مؤصده=شالت ردى ، في متنها ياليت ، ربي شالها
يا رب يدعيك إجبلي ، أرجاك يا من أعبده=يا رب أنا فارس ، رجيتك ثور إبزلزالها
دمر كيانه ، دهوره ، يا رب شتت مرقده=هذا ومن مثله ، حرم أرضه مزون إخيالها
يا رب أنا مسرف بهم ، كل الشروط إمشدده=من قسوتي ، تسمع ، ونين النفس ، مع ولوالها
شاعر من الجبلان ، أسمي كل جمله ، مفرده=أشرح ، فعل يمنى الرجل ، بإعرابها وأمثالها
قلته ، وفي حزة غضب حرفي ، لناس إمحدده=غصبٍ ، على إخشوم الجميع ، بفرك خشوم إرجالها
فعل الردي ، ذلّ الردي ، دينن عليه وّسدده=وريح الزمن ، طول الزمن ، ما هز صم إجبالها
تراي من شفت العرب ، تاكل دجاج إمجمده=عرفت ليش ، أنته دجاجة ، برود دمك قالها

قريت قافٍ ما أجزله .. من فوق سحب مشيـده ..=.. من شاعرٍ سيّـد حروفـه .. لا تهيّـض قالهـا
ثم ترضخ القيفان طاعه .. لأجـل منهـو سيـده .. =.. هو سيد الجـزلات والله .. والطويلـة طالهـا
الكامل أللي نعرفه .. يـا مسعـده يـا مسعـده ..=.. بالفعل فعلـه طاغـيٍ .. والطيـب رنـة مالهـا
والناقص أللي مـا حسبنـا .. حسبتـه ثـم زوده ..=.. ثم زاد في فعـل الـردا .. محـدٍ درا بأفعالهـا
أللي يخون بصاحبه .. وقت اللـزم يـا مقـرده ..=.. لو شال أمره في يده .. وأعطى هدايا ادبالهـا
والمشكلة وجه الردى .. ننشد على مـن صعـده ..=.. ااالله يجـزااا مـن عطـا .. والله يخيـب فالـهـا
أللي على وضح النقا .. معروف فعلـه نحمـده ..=.. من بعد ربي نحمده .. والله جـزا مـن شالهـا
زول الردي وقت الضما .. نشره على أللي جمده ..=.. والطايله وقت الهدد .. تشفق علـى مـن نالهـا
هذا نحسبه قردهم .. وأللـي قرد مـا نعـدده ..=.. الصفر من تحت العدد .. والصفر ظنـي خالهـا
وأللي بنا طيب وكرم .. قصر الكرم مـن شيـده ..=.. يا كود فعل أهل الكرم .. وأللي سعـا يسعالهـا
السوق مكثر سلعته .. فيـه الصنـوف امحدده ..=.. وإللي يبي يدفع هواه .. يدفـع لبحـر أموالهـا
يبقى على راس السلـع .. الجيـده مـن جيده ..=.. وأللي عجز يدفع هواه .. ينشـد علـى أحوالهـا

الموضوع الأصلي: (( فارس )) // (( خـالد )) || الكاتب: خالد الرشيد || المصدر: منتدى الجبلان الرسمي

المصدر: ::منتدى الجبلان الرسمي::