وين هالغيبه عسى ماهي إفـراق=ليه تبخل بالمجـي خلّـك كريـم
خابر ان الجرح لا صابه حـراق=مـا يفيـده طـبّ والله العظيـم
ينشدوني وين من رمشه دقـاق؟=قلت مدري ذاك خبري بـه قديـم
الغلا راعيـه لـه قلبـن رقـاق=لو جفيته صارت ضلوعه هشيـم
لو زعل لو شال غيضه واستضاق=ما يخرّبهـا وجرحـه بالصميـم
ادمـح الـزلاّت زلاّت الـرفـاق=خصّ لا من صار راعيها حشيـم
واكره الخـوّان كرهـي للعـراق=واعشق الوافين عشقي للقصيـم
عند اهلها غاليه وضـح النيـاق=وانت عندي يمكن اغلا يا وسيـم
ان بغيت افراقنـا هـاك الفـراق=وش نبي بالحب دام الحب ضيـم

=================

طاب السهر عيت تطيب النفـوس=جت من الله واناكـم كنـت محتاجهـا
كنها من حلاهـا كـل ليلـه عـروس=خايفه من عيون النـاس واحراجهـا.
حي هالطول يـازول عسـاه محـروس=مـن عبـث لوعةالايـام وازعاجـهـا
تزعل نفوس وإلا تمتلـي غيـظ روس=من يقـرب لهـا وضلوعـي سياجهـا
لامتى وانت ياشوق القلوب محبـوس.=طالـت السالفـه وابطيـت بعلاجـهـا
جعل قلب على نـار الغيـاب محمـوس=يحتـرق بيـن صاليـهـا ووهاجـهـا
من خبرله غلا بين الضلوع مغـروس=غرسة كلبـو شعـري مـن انتاجهـا
لاتقرب لك الفرقـا هذيـك الهجـوس=من متى والبحور تفـارق امواجهـا.!
لازم اصبر على وجه الزمان العبـوس=لين سود الليالـي يضحـك احجاجهـا
من بغى يقطع الفرجه يعـاف الجلـوس=ليـن ياصـل نهايتـهـا ومخراجـهـا
كان شعري قصر ماطال شمس الشموس=تستريـح القصايـد داخـل ادراجـهـا

======

ذكراك لاهبت يجـي عطرهـا صلـف=واستنشقـه بالصـدر مثـل الخزامـى
إي والله إن غيابهـا مكلـف كـلـف=إي والله ان عـروق قلبـي تـوامـى
رمش النواعس والحجاجيـن والزلـف=يامـا خـذن قبلـي قلـوب النشامـى
أمضى من المصقول واسبق من الشلف=سهم الهـوى لوكنـت عنـه اتعامـى
لايخدعك صبري على الجرح ماخلـف=هالشعر غيـر جـروح قلبـي تدامـى
لي خاطر بينـه وبيـن الشقـا حلـف=يامـا عثـت فيـه المقاديـر يـامـا
من عاش هالدنيا بلاصاحـب وولـف.=عز الله انه عـاش عيشـت يتامـى .
خل السوالـف والمشاريـه والحلـف=مبطي وانا علـى الجـروح اتسامـى
قلب يضيق بذكريـات الهـوى جلـف=وقلبي مثـل جـرد القفـار ايترامـى