رديه بين مفرح الضمني ومحمد الخس

رديه بين مفرح الضمني ومحمد الخس

مساجله شعريه بين الشاعرين

مفرح الضمني ومحمد الخس


يقول مفرح الضمني:


الله من قلب هجوسه عصنّه=كنّه يسمّر في ضلوعه مسامير
ياطارقاً نجر الهوى لا تدنّه=جورك عليه يكسّر القلب تكسير
وآعزّتي لسعود من كبر سنّه =عنه انتحى عصر الصبا والغنادير
في مامضى غيد الصبايا يبنّه=واليوم ماله من وراهن مشاوير
حتى ابن هادي بالعيون إحربنّه=تغيرت لفتاتهن والمضاهير
ماكنهن عقب الغلا يعرفنه=راحن على ريف النشاما مواخير
والخس في قلبه من الحب لنّه=مركز دفاعه بين هدمن وتعمير
واليا نشدته قال قلبي خذنّه=يامن ذكر لي وردهن والمصادير
وصحن الىا شفته مع الناس كنه=بين الرجا والياس يرسل مداوير
يطحن غرامه والهموم اطحننه=يشكي على دبيان بعض التدابير
اقفى جديد العمر مافيه منه =اقفاي عشبٍ جاه صيف ومعاصير
كنّت مزونه والسمايم شونّه=وابعد ثراه ويبسن النواوير
ليت الليالي ماخذن رجعنه=ينشاف زمل مدوجرات البواصير
يوم الحطب بحبالهن يجمعنه=بين الفياض وسانحات الدواوير
راع الهوى لو مايجيهن يجنه=والشك زايل والطوارف مسايير
واليا لفاهم طارشاً ينشدنه=عينت ماعينت من غير تقصير
واليا تلاقن من ربيعا مضنه=تقبلن مقطانهن بالتباشير
والعصر غالي لبسهن ينشرنه=بين البيوت وبين ورادة البير
يازين صب الدلو بقدورهنه=قدام تروي مرزمات المعاشير
مافيه رادو بالغنا يسمعنه =والا جهازٍ يختلف بالتصاوير
بس المدوه يوم للبوش حنه =وقولت ياراع الساميه بالمحادير
راع المحبه يالنظر يشغلنه=تنشق دلوه بين روس المناعير
كم عاشقا بخودهن صوبنه=ومعكرشاً فوق الردايف دعاثير
على العبس ومن الشمطري غذنّه=ماقصصوهن عاملين الكوافير
واليوم وقت يوذي الناس فنه=عشق الهواتف والصور والمزامير
وسعود صاح وتالي الصوت ونه=ومحمد اخفى صيحته بالمعاذير
ابو خلف عجف السنين امحننه=يومين والا يذكر البيض بالخير
طشوا كلايف جيشهم والاعنه=ماعاد قالوا درجوهن مغاوير
يارب بدّل نار الايام جنّه=واغفر ذنوب اهل الوجيه المسافير



ورد عليه الشاعر محمد خلف الخس:


ياللي تدن النجر دنه ورنّه =خلّه يجضور من غرامه تجضوير
حنا هله كان اليدين اطلقنه=الى منها قلة عليه المساعير
مايملكنّ ايدننا يخرجنّه=من قبل لاتكثر علينا الدنانير
لاشك بعض ربوعنا مستجنه=قاموا علينا يططلقون الحناجير
اشوفها من غير لنه وهنه=قامت تفجر بعض الالغام تفجير
جتنا بهم خيل الفسق مستعنه=مدري وش المقصد ورى مطير لمطير
حنا نسايرهم على حسن ظنه=ونسامح المخطي معزه وتقدير
واليا تجاهلنا خطاهم محَنّه=قالوا بلاهم خوف والا معاسير
والخوف منه قلوبنا مطمئنه=ماهمنا شلفا بن غانم ولا الزير
ان التفتنا للسباع المسنه=تبي تصير الشلف حدر القناطير
اخير للدنيا تجي مرجهنه=قدام راع الكير ينفخ على الكير
وان كان جت للشعر حنا مغنه=حنا مصخّرت التماثيل تصخير
لو نلحق المشقاص قوما مغنه=فرّت بعض ناساً فرير العصافير
اليا فتحنا باب شعرٍ نكنه =يسلم لنا الكافر ويركع لنا الطير
والله يلولا خطو رجل نحنه=لأقلب على ناسٍ هنيّا مخامير
لاأسن فيهم شي محدن يسنه=شيئا نجيبه قطعةٍ من زمهرير
يابعضهم ياعضاه ماينقلنه=وانه لينكلٍ جميع التهاتير
لاشك جتنا من ربوعا مضنه=سوالفٍ مااعرف لها كل تفسير
اقربهم مفرح هجوسه عصنه=شغل تماتيكه على غير تعيير
يوم البيوت اللي بنى شجعنه=اذاعها بين الدول والجماهير
وادلى على ربعه بشيئا يضنه=يقول اشوف الشيب فيكم مغاتير
والشيب ياراع التماثيل سنه=ماعذرب اللي ينطحون الطوابير
حمّاية القشرى الثبار المدنه=الى قبل ذولي جن وذولي مصادير
الشيب مابه عيب لاتحسبنه=العيب من جنّب طريق المناعير
من شب شاب ولو سنينه عطنه=والشيب في وجه الرجل زود تقدير
وان كان به عذروب مافيه منه=انته نزلت إمع الرشاء فأسفل البير
عودٍ وجسمك يقرع اقراع شنه=تبي تصيغر وانته اكبر من النير
هرش الحضيره باركٍ له بعنه=ثاوي وعينينه بالأمه مطايير
اليا شاف من تمشط شعرها بخنه=قام ايتلفت وارزم ارزامة بعير
يبي السنين اللي مشن فاختنه=ايام ورد الماء ولبس المقازير
يومنهن بعيونهن يفتننه=نجل العيون مزعلات الحجاجير
اللي كما ارقاب المها ارقابهنه=تقول فيهن مثل ماياصف عمير
كن العسل في مفلج عذابهنه=والموت لامن دلعن بالأزارير
كنّك تشوف اللي ورى حلوقهنه=ونهودهن حمر وفيهن دواوير
مثل ابو فيصل بالهوى يشعفنه=لاشك اظن الزند مافيه تشرير
واليوم فارقهن وهن فارقهنه=لو انه اغلى الصبغ عند العطاطير

الموضوع الأصلي: رديه بين مفرح الضمني ومحمد الخس || الكاتب: متغلي لعيون غاليه || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

لاهنت يامرمح

صح لسانهم .. وتسلم يمناك ع النقل الممبدع

يعطيك العافية

على الأختيار المميز

تقبل مروووري وخاااالص شكري

أخوك (فهد عيد الجبلي)

لا هنت اخوي مـ^ـرمـ^ـ7


على الطرح الراقي

وصح الله لسان الشعار


بانتظار جديدك من الابداع والرقي بالمواضيع



تقبل خالص ودي ومروري ....

لاهنتم على المرور

سعود الامي

فهد عيد الجبلي

أبن غظيان

منورين الردود

صح لسان الشاعرين والله يعطيك العافيه على نقل الطيب


وكل اشكر لك وتقبل مروري

محمد بن حلبيد

نورت الردود ولاهنت