أنا مانيـب مثلـك بالوقاحـة ...... ؛ ابن لعبون ؛

أنا مانيـب مثلـك بالوقاحـة ...... ؛ ابن لعبون ؛

مما أعجبني من نوادر الشاعر العملاق محمد بن لعبون رحمه الله

ألايابـارقٍ يوضـي جنـاحـه=شمال ٍ وأبعـد الخـلاّن عنّـي
علـى دار ٍ بشرقـي البراحـة=تخلّـت مابهـا كـود الهبنّـي
لكنبها عقـب ذيـك الشراحـة=إلـى مرّيـت بسـم الله جنّـي
يفـز القلـب فيهـا للصباحـة=إلـى قامـت حمامتهـا تغنّـي
توصينـي بأهلهـا بالنياحـة=يعود إن الحمامة خيـر منّـي
وأنا وإن كان لي بالنوح راحة=فأنا بأنوح دهـري مـا أونـي
وترى للهم والسلوى نصاحـة=ولا تسليـن سواتـي بالتمنّـي
وأنا مانيـب مثلـك بالوقاحـة=على الجدران طرب ٍ ومتهنّـي
ولا روجعت فن ٍ فـي براحـة=على نبنوب غصـن ٍ مرهنّـي
وقالت جامـع ٍ كـل الشراحـة=ولانتب سامع ٍ ذالصوت منـي
ومثلك يدّعـي زايـد فصاحـة=وطريح الغـي لالمتـه يونّـي
أبات الليل في رجـوا صباحـه=وأدق من الندم بالعـود سنّـي
على فقـدي لغـزلان الملاحـة=طويـلات المعانـق أسفهنّـي
ولا ثوبي غدا يطرخ اشلاحـة=يـدق القـاع ردنـه وبتثنّـي
ولا أردح جزت من ذيك الرداحة=عقب خبرك ليالي لي مضنّـي
عليهم صار في خـدّي قراحـة=من الفرقا وشفني ويش كنّـي
وقالت من مشى مثلك بساحـة=وحاله حال من كثـر التغنّـي
وفي بحر الهوا يسبح سباحـه=كثر شربه ولاهـوب امتهنّـي
ومن فتّق أفتـوق ٍ بالفصاحـة=وعرض مذهبه شيعي وسنّـي
ومن خلى البني بكـل ساحـة=يخفقـن الدفـوف بكـل فنّـي
أنا ولا أنت يامن فـي مزاحـه=يعرضنـي التمانـي بالتمنّـي
وقلت لها ودمعـي بنسفاحـة=سقيت السفح من ذاك المغنّـي
عسى من هو كذب يكسر جناحه=ولا يحضـى بحبـه والتمنّـي
فساد الغي ردّك عـن صلاحـه=ونسّاك الثنـى لأهـل التثنّـي
وأهل ذيك اللطافـة والسماحـه=رعا الله عيشهن يامـا رعنّـي
ولكن يوم صبري منـك ماحـه=عنادك لي وقصـدك تمتحنّـي
فقوم وشوف لوني كالمحاحـه=وأهل هالجيل مايحكـون عنّـي
فعاد اليوم لومـك لـي قباحـه=وضنّك بالهوى يخلف لضنّـي
على الله الهدى يامن صلاحـه=إلى جنّة بنات الشـوق حنّـي
حديثه بالهوى تروى اصحاحـه=ضعيفات النسايـم بـي ترنّـي
عن الضحاك عن مبسم أقاحـه=عن البرّاق عن ثغـره رونّـي
حبيبـي كـل ماهبّـت رياحـه=سفى للريح نوج ٍ ضـاع منّـي

اتمنى ان تنال استحسانكم،

الموضوع الأصلي: أنا مانيـب مثلـك بالوقاحـة ...... ؛ ابن لعبون ؛ || الكاتب: мя.ĵβĻiŷ || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

عليهم صار في خـدّي قراحـة
من الفرقا وشفني ويـش كنّـي


رحمه الله عليك ياابن لعبووووون
جزل
وشااعر لن يتكرر

بكيفي جبلي

يسلم احسااسك الاصيل
على هذاا الاختياااااار

شكراا

جمرة مطير

أشكر لكي طيب التواصل

الذي دائما يكون دافعاً للتميز , كما اني اشكرك على جهودك الواضحه في هذا المنتدى

لاعدمناك اختاً كريمه

صح لساان الشاعر وبيض الله وجهك اخوي على الموضوع والنقل ماقصرت

الله يرحمك ويسكنك الجنه يا ابن لعبون ..... فعلا شاعر عملاق


بكيفي جبلي


تسلم ايدك ويعطيك العافيه يالغلا


والقصيده ككل روعه بس وصف هالبيت عجبني حيييييل .......

أبات الليل في رجـوا صباحـه=وأدق من الندم بالعـود سنّـي

فهد التوم

ياحيك وياحي قلبك يابن العم

اشكرك على تواصلك

نبض الغلا

الروعه تكمن في تسجيل مرورك اختي الكريمه

فلا تحرمينا هذا التواصل

تحياتي لك

بكيفي جبلي
ذائقتك الراقيه تستحق الاعجاب والثناء
شكرا على هالمختارات والنقل الرائع
اخوك
بن معرقب

سسسسسسسسسللمت يمنآك يـ ذوووق


ربي يعطيـك العاآفيه وصح البـــــــــك .. دمت بود

بن معرقب

حياك الله يالطيب , واشكر لك تواصلك الراقي

لا خلا ولا عدم