قصيده لشاعر بدر الشيب

قصيده لشاعر بدر الشيب

السلام عليكم ورحمة الله وبركاته
قصيده للشـــاعر/ بـــــدر الشــــيب الميموني المطيــري موجهه للشاعر/ لافي الغيداني

ياشذى عطر القصيد اقبـل ورش بيوتـه=شفني ارسم قاعدة شعـر النبـط وابنيهـا
راكب اللي لمعـت السبـع علـى كبوتـه=ويش اوصفهـا ياربـي ويـش اباحليهـا
كنها شاطي بحـر يـوم يتطـارد حوتـه=او كما خبراً على الطينه صفـا صافيهـا
جيب لكزس برمجة سلفه علـى ريموتـه=يستمـد الــوان فضـيـه ويستمديـهـا
كن واجهته من اصناف الذهـب منحوتـه=ولمعـت جنوطـه وبوديـه تمـرّا فيهـا
ان نطحته تقـل هـداف ٍ هدفـه يشوتـه=وان قفيته شبـه ذيـب ٍٍ غارتـه ناويهـا
وان تعـرض كنـه اللـي سبقـه مفلوتـه=اشقر ٍ يهوي على الصيـده ولا يخطيهـا
وداخلي الكشـن صالـة محتكـر تايوتـه=صالـة ٍ عبداللطيـف بمحتـوت بانيـهـا
ساع حطـت بويتـه ومرايتـه وزيوتـه=حي والله هالجيوب وحـي مـن يشريهـا
ان مشى صحراء من السرعه طغا طاغوته=وأن مشى فالمدن حسـاده طغـا طاغيهـا
لوتحط اذنك لشكمانـه ماتسمـع صوتـه=يمكـن انـك تستشـك ودقتـه تثنيـهـا
سايقـه مفـت فـوق المرتبـه بسكوتـه=ولا عرف طعم الكابتشينـو ولا يشريهـا
استدار من الريـاض وطرقتـه منعوتـه=المخـارج للقصيـم ليـا سـرى يعطيهـا
ومع اذان الفجـر قـدام الصـلاه تفوتـه=واصل ٍ دخنه صـلاة الصبـح ويصليهـا
وعقب ماصلى الصلاه الساعـه الموقوتـه=نحره كسـاب قولـة نعـم هـو راعيهـا
واحدٍ ماصار عـرض لهرجـة الشاموتـه=فاتح ٍ بـاب المضيـف وكلمتـه حاميهـا
ماقعد يحسب خساير ماخسر فـي كروتـه=ماحسـب مخسـار حايلهـا ولاحاشيهـا
لافي اللي فايـت ٍ بالطيـب قبـل يفوتـه=ذخر قوم ٍ نهج حاضرها علـى ماضيهـا
ذخر حرب اهـل فعـول ٍ كلهـا مثبوتـه=ثابـت التـاريـخ يمليـهـا لمستمليـهـا
وعقب ماانهى ضيافته والعلم جات وقوتـه=سلمه زرف القضيـه قـال انـا قاضيهـا
قصة المرسـل يفكـر والهمـوم تشوتـه=اسمع الدعـوى بصوتـه ليـن تستوفيهـا
اشتكي خسران ماني مـن خسـر بيلوتـه=خاسر ٍ عذراً يهيّـض خاطـري طاريهـا
مالهـا جـوال حتـى اسجلـه فالنـوتـه=بنـت بـدوان ٍ تصبّـح دار وتماسيـهـا
شفتها صدفه وبهـت وفرصتـي مبهوتـه=قلـت ويـش انتـي وتتعلـم ولا يمديهـا
وعقبها ترجـع ديرنـا والديـر موقوتـه=وتكثـر الحّـوال ناقلهـا علـى ماشيهـا
واتتبعـهـم وادور نزلـهـا لافـوتــه=جالهـا عاميـن يـالافـي ومتباطيـهـا
ويوم جيت اليا الفريـق بويتـه وفروتـه=ليا انها تزهم علـى المقهـور ويباريهـا
واتحـرى فرصـة ٍ فـي لفـة ٍ ملفوتـه=ودي اخذ عهدهـا وابـدي علـى واليهـا
ولاش فرصه والعـرب شماتـةٍ مشموتـه=خفت ممن يشعـل الفتنـه ومـن ينشيهـا

الموضوع الأصلي: قصيده لشاعر بدر الشيب || الكاتب: أحمد بن هادي || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

صح لسااان بدر الشيب قصيده جزله

والله لا يهينك يا احمد على ايرادها

لكن ليس مكانها في هذا القسم

انما مكاانها في قسم الشعر العام

الرجاء تقبل مرووري بصدر رحب

شاكرلك

صح لسانه.......

ولاهنت على النقل ......


يعطيك العافية