روائع . . وليست رائعه / / محمد عوض بن سرور الديحاني المطيري

روائع . . وليست رائعه / / محمد عوض بن سرور الديحاني المطيري

السلام عليكم ورحمة الله وبركاتو

هذه مجموعه من روائع شاعرنا المعروف والمتميز محمد بن عوض بن سرور الديحاني المطيري


نقول محمد بن عوض بن سرور فيتماثل الشعر طربا ليأخذنا إلى عوالم الإبداع الحقيقي مع رمز من رموز الشعر في الخليج تجد عندما تقرا له نصا شعريا انه يرسم بريشة الكلمات لوحة ملونه بالمعاني الجميلة
فهو شاعر يعرف مفاتيح القصيدة الجزلة التي تمتلئ بكبريا وأنفة الرجل البدوي

يقول :

وكانها وصلت لحمران النواظر
كيف ابإذخر شي ما عمري ذخرته

بيت من قصيدته التي يقول فيها

والله انـي ذاكـر ومانـي بذاكـر
وأكثر اللي فات عمـري ماذكرتـه

اذكر أني كنت أجازف كنت أغامر
وكل دربٍ يتعـب الهقـوه عبرتـه

وأذكر أني كنت قبل اكون شاعـر
والشعر لو ماشعربي مـا شعرتـه

وأذكر إني كنت اصيد وكنت شاطر
وكم غزالٍ مرنـي عجـل وعثرتـه

بس عيبي كل عيبي كنـت أكابـر
ومن يصد بنظرتـه عنـي حقرتـه

ليتنـي .. ياليتنـي يابنـت خابـر
كان عيبي يـوم صادفتـك سترتـه

لين تروى من محاجرك المحاجـر
وأن روت رديت للستـر وشكرتـه

إنتي اصلاً شي ماهو شـي عابـر
كـم تمنيتـه وكـم ليلـه نطـرتـه

ودفتـرك لا يابعـد كـل الدفاتـر
اعتبرتـه ليـل عشـاق وسهـرتـه

شاعره ويعج بك عطـر المشاعـر
مرهفه وإحساسك المرهف عمرتـه

جوهره مأنتي مثل كـل الجواهـر
يا حلو فيـك القصيـد ليـا نشرتـه

وكانها وصلت لحمـران النواظـر
كيف ابإذخر شي ما عمري ذخرتـه

ويكفي إنك ذاكره والوقـت ذاكـر
وإلا انـا ياكثـر غيـرك ماذكرتـه

من هذا الجمال إلى جمال أخر ومن جزل إلى أجزل فهو لا يقدم إلا المميز دائما

إليكم هذه القصيدة:

تبسميي يـا باشـة البيـض والسمـر
وشعـاد باقـي للخـجـل ياخجـولـه
سمي فدك العمـر يابهجـت العمـر
عمـر تزاحمبـه اسلـوم الرجـولـه
تدلـعـي تدلـلـي امــري امــر
اللـي سواتـي مايـحـب بسهـولـه
فيك اكتشفت ان البرد داعب الجمـر
وان قيـل لا قولـي محمـد يقـولـه
ودريت عن عشق السراجيف للضمـر
شافن نحل خصـرك ولاهـن بحولـه
ومثل الغروب اطراف حد الشعر حمر
والا جديلـك ليـل ارخــا سـدولـه
كني اعرفك يوم كان الحصـى تمـر
وانتـي نهـار القـاك مـادار حولـه
يابنت هذا العشق مالـي عليـه امـر
سحر الانوثـه جـاب راس الرجولـه

تنحني هامات الشعر وتترجل كل قوافيه وتمتلئ بكل ما هو جزل حينما يكتب محمد بن عوض قصيدة بحجم

الشيخ : ماجد بن عبدالعزيز بن فيصل بن سلطان الدويش

نص جميل جدا جدا يقول فيه

ياعلّ نوٍ مـن المنشـا وميضـه سـرى
تدفه النـود ويـرص إبعضـه ويحـدر
يقبل ولا عقب العـرق الموالـي ورى
تسكر هبوبـه ويـرزم راعـده ويخـدر
ويمطر على ديرةٍ للبل مسـاس ومـرى
وربيعها يشرح الخاطر ويشـف الصـدر
ومع ذا وفيها لحمـران النواظـر ذرى
شيخٍ علـى كـل شيخـان القبايـل نـدر
ومطير فالأرض والراس الكبير إخشرى
من فيصل إليا العزيز لماجـد إليـا بـدر
قول: الدويش وتلاشى في نظرك أومرى
وتروح كـل الأسامـي لاذكرتـه هـدر
وياهيه ياللي حمولك كبر هضبة كـرى
والعالم ازروا يفكونـك وحكمـك صـدر
عليك بعيال ماجد وأبشـر إبمـا تـرى
اصغرهم اللي ليـا منـك نصيتـه قـدر
فكوا قيود إسجنا وأغنوا يديـن إفقـرى
ومن عاش معهم لقى جاه و وقار وقـدر
يلومني فـي غلاهـم جاهـلٍ مـادرى
لو شاف عبدالله و واجـه سعـود وبـدر
ولو إن ما أحدٍ كتب مايمدي أحدٍ قـرى
والله جعل ناس فوق وفيـه نـاسٍ حـدر
يقولهـا شاعـرٍ كـم قلـدوه إشعـرى
من كثر ما ورد غبات البحـور وصـدر


*****************


ومن فضل ربي ومن جوده ومن خيره
إني سعودي ومن هالأرض ومطيـري
وإن كان من حب ربعـه حـلّ تكفيـره
عزّالله إنـي كفـرت وحـلّ تكفيـري

حينما وقعت عيناي لأول مرة على هذين البيتين فـ أول ما تبادر إلى ذهني من معاني جميلة ومفردات بليغة وانتماء حقيقي لوطن ولقبيلة أجد أنني تعرفت من بعد على ملامح شاعر قلما يجود الزمان لمطير بمثله وكأنما شاعرٌ من ذاك الجيل هو من نظم هذه الأبيات

ياعـلّ نـوٍ تكاشـف فـي مزابـيـره
وتسوقـه النـود مـن قِبلـه محاديـري
ينثر على دار اخو جـوزا شخاتيـره
اسبـوع والغيـث رذراذ وشخاتـيـري
وإسبوع والصلب كاسيتـه مخاضيـره
وإسبوع وتبـرّك إضحـيّ المعاشيـري
وإسبوع والعشـب متشابـك نواويـره
يعني شهر حسب تصويـري وتقديـري
ويالله ياللـي بيـدك الخيـر والخيـره
يارازق الداب وسـط الغـار بالطيـري
تعـزّ مـن عزّنـا بإسمـه وتقـديـره
الشيخ نسل الشيـوخ أهـل الأساطيـري
فيصل ولد بندر الفيصل ومـن غيـره
اللي ليا شار مـا أحـدٍ غيـره يشيـري
دويش الأمجاد شيـخ الشمـل وأميـره
من قبـل لا تطلـع شيـوخ الدنانيـري
من راس بندر وبنـدر طيـب السيـره
هميلـعٍ رجـع الشـهـب المدابـيـري
وحفيد من ترعب البصـره طوابيـره
ويفنـي طوابيـر ويفـرق طوابـيـري
اعظم سلاطين نجد اشهـر مشاهيـره
الهـارف إن كـان تقـرون التقاريـري
يقود حمرا مطيـر ويبخـص مطيـره
ومطيـر فريـس ورمـاه ومناعـيـري
واليوم هذا الدويـش بحسـن تدبيـره
عليـه خطـلان الأيـادي مسايـيـري
مطير لرضاه مـن ديـره ليـا ديـره
على الجيـوب ويسوقـون المظاهيـري
ويوم إن كلـن يمـاري فـي مغاتيـره
شوفوا مغاتيرنـا يـا أهـل المغاتيـري
وضـحٍ وبرهـن لـو اشبـه دواويـره
عقـود الألمـاس فصـدور الغناديـري
وهذا المزايـن بيجـي مزايـنٍ غيـره
وباكر تشوفون ويش اللي يبـا يصيـري
وعقب استوى القاف والطرق لشواعيره
شديت هالطرق مـن فكـري وتفكيـري
ومن فضل ربي ومن جوده ومن خيره
إني سعودي ومن هـالأرض ومطيـري
وإنكان من حب ربعـه حـلّ تكفيـره
عـزّالله إنـي كفـرت وحـلّ تكفيـري
وليا افتخر كل شاعر فـي جماهيـره
اطلـق جماهيـر فالساحـه جماهيـري


*********


أحيانا تتداخل جميع المواضيع ويمر الشاعر من خلالها بلحظات لا يدري عما يكتب
أتدرون ماذا قال محمد عندما عاش هذه اللحظة

( ليت الهوى مثل الوغى شلف واسيوف )

والله مدري وين اوجـه يابـو نـوف
كـل الـدروب مجـوده وامحمـيـه
وانا على خبرك معي حزمه احروف
لـو تنفجـر ماضـاع منهـا شظيـه
احلام وآمال وطموحـات واظـروف
والذيـب يقنـب والمطـيـه مطـيـه
والخوف والله مادخل قلبـي الخـوف
الا مــن الـلـي عـالـم بالخفـيـه
والجادل اللي حبها ساكـن الجـوف
جعلي فـدا( ن) لجدودهـا الواصليـه
مثل المها مرت على مـدت الشـوف
مادونـهـا الا سهـلـه جـرهـديـه
ان وقفـت جاهـا ثمانيـن ملقـوف
*
وان روحت ضاقـت علـي الفضيـه
اشوفهـا واصـد ماكنـي اشــوف
*
والعـذر ياشرهـت سنـام وطمـيـه
وادريبها ترزم من الشوق واتشـوف
وانـا عليـهـا اجـرهـا سامـريـه
والياس من راسي له اسنين محـذوف
وخيـط الامـل عيـت تنوشـه يديـه
ليت الهوى مثل الوغى شلف واسيوف
والله لصير ( اغنيـم ) فـي الدحمليـه

وفي هذه الرائعة يرتقي ابن عوض بالشعر دائما كما عودنا
هذه قصيدة شامخة من رجل شامخ أتى بها وهو يظهر بعضا من عدم الرضاء في داخلة حتى أينعت رياحين الشعر وحان قطافها :


الشعـر فيصـل حـق والحـق معلـوم
** سيف ليامـن شفـت ماعفـت اسلـه
وللبـدو عــادات وتقالـيـد وسـلـوم
** وللناس مـن مبطـي شريعـه وملـه
وحنا بـدو عـن غيرنـا نفـرق السـوم
** ياطيبنـا لا بـان فالـوقـت خـلـه
وحنـا مطيـر ونفتخـر دايـم الــدوم
** ومن غير اخو جوزاء على الشمل كله
وحنـا بريـه إن كثـروا ربعنـا اللـوم
** والله مـا نصبـر علـى كـل زلـه
بريـه فـريـس وصنـاديـد وقــروم
** وشيوخنـا مثـل الجبـال المطـلـه
والبيـت مـن فاضـل لحمـدان للـيـوم
** والنـاس تلجـي لـه وكلـن يـدلـه
بيتـن قديـم ولـه علامـات ورســوم
** وفي صفحة التاريخ يوضـي سجلـه
وصلال ياما صل روحـه علـى القـوم
** لا قـال لا واجـد ولا قـال قـلـه
وفدغوش يـوم الحـرب لبريـه زيـزوم
** ومـن هيبـتـه قبيلـتـه مستقـلـه
ومن يوم طـاح العـود ومناحـي يقـوم
** ومـن يـوم قـام وقومتـه مسفهلـه
واليـوم ياخالـد غـدوا ربعـنـا قــوم
** كلـن يـزوم وشايخـن فـي محلـه
تقـول ماللـنـاس عــادات وسـلـوم
** وتقـول ماللنـاس مذهـب ومـلـه


تـــــابـــ‘ع

الموضوع الأصلي: روائع . . وليست رائعه / / محمد عوض بن سرور الديحاني المطيري || الكاتب: سعود بن لامي || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق