ادله مادامك عايشٍ وادع للميت=وصلي الفرايض والمقدر منيه
وليا اجتهدت الله مقَدِيك واقْدِيت=كفاك سو العاقبه والبليه
شموخ راسك يخذله قول ياليت=مادمت تقدر والعزيمه قويه
للعفش طرِبل هنقلٍ فوق وانيت =والجيب خله للنشاما مطيّه
والاشقر القرناس جنبك على السيت=مثل الغلام اللي على ايمن خويه
افجح هزع منكب تقل من هل البيت=سادة قريش وعنبر الهاشميه
وليا نزلت بخايعٍ قفر وامسيت=بَد الدلال ونفل الشاذليه
شب الغضى واحمس مزاج الشفاليت=بريةٍ تجلب لنا مقدريه
حماسها تقل يسوق الختاخيت=ونوبٍ على اتالاهن يرد اوليه
حيران شعلٍ له تمايل ملافيت=صف السرايا اللي تصافق أحّذِيه
خولانين بش العرق كنه الزيت=وكمل شعال الحمسة الشمريه
كبه بمبرادٍ من الجِد له ليت=تشدي لحمر الكهرمان النقيه
دقه بجوف مكوسره بالسباريت=طنيب ذيب بالفجوج الخليه
بغداديٍ يمناه في كف سمْيِّت=-هواوي البيداء كعام اشوسيه
دقه ثلاثٍ عقب طارين تصويت=صفين حفل وشالوه سامريه
وفيت بهّر يااطلق حجاج لااهفِيت=هدى السريب وجاك فوحه سويه
صبه بلجٍ حومرو طارهن صيت=مثل مضاحك ملّعجات الثنيه
ولامن قدعت من الخلاص وتقهويت=زال الخوى عنّك زوال الغشيه
عقب الفجر لابيّح الشوف مديت=وفرعت بالقرناس بارضٍ عذيه
وليانتل سبقه على طول هدْيت=مايجهل الصقار عادة ركيه
ومن الولع في ساقته ماتداريت=كن ابيض الفكس ار جلد برديه
يردم سما لحاق شردٍ عفاريت=اقفت دواغرها مكاشح ضويه
لحّقك زمل يومك شعرت انك ابطيت=عينك سما والارض ماهي سويه
وحول تثوع محجلاته وهدَيت=وضربت بسامك على مقدميه
وطبقت له تنده تهاديه وهِديت=مسطور قومٍ في مصارع عبيه
كخ العدم بفمه تقل كخ كبريت=متقحمٍ مخالبه شوشليه
والطير فعله نومسك واسفهليت=وهدن وصادن الطيور البقيه
بمجارساتٍ ماعفلها كواشيت=ماكنها الا بالشبوك محميه
ولاخذت لك عشرين يوم وتشفّيت=راحت طرايف والضماير نقيه
ورجعت للديره عقب ماتمشيت=صدرك من هموم البلاد معفيه
يالله ياللي تحيي النفس وتميت=منهو سواك مكرم المهمهيه
هديك وغفرانك ورزقك وتثبيت=ياجاعل الحسنات ممحات سيه
يارب سترك عن شمات الشماميت=جلابة النمه بسوق الاذيه
صلاة ربي عد ماحصى ولا احصيت=عليك يالهادي محمد واليه