ألف أولف من كلامٍ نضيفي=ودموع عيني فوق خدي ذريفي
من لامني في حب ذاك الوليفي=أدقاق رمش العين سيد الخوندات
خوندات ياللي مابعد عاشرّنـه=قله تراهن بالهوى يذبحنه
قلبي وقلبك يالموّلع خذنه=عزي لمن مثلي تعرضت الآآفات
الباء. بليت بحب خلي على ماش=ولا حصل لي منه مايبرد الجاش
غديت أنا وياه طاسه ومنقاش=بالوصف كني يالمعزي سلامات
معزي سلامات الذي يذكرونه=نبي السلامه منه وإهي المعونه
يقول طيـّب مير غارت عيونه=سبب ولدكم واحدٍ صايبه مات
التاء. تبعت الزين والزين مقفي=أمشي وحتفي شايله فوق كتفي
لاشفت مجدولٍ وكتفٍ وردفي=ما أقوى ألتفت لوّ طوحولي بالأصوات
أصوات لوّ قالوا سفيهٍ وسايح=طرد المقفي للمشقا فضايح
قلت أيه مير أعلومكم والنصايح=مثل المطر فوق الصحون المكفات
الثاء.. ثمانه حب رمّان طايف=أوّ قحويانٍٍ في رياضٍ عطايف
متنفلٍ بالزين سيد العفايف=عمهوجٍةٍ فيها من الحور شارات
شارات فيها من ظبيّ الحمادي=هيّ لذة الدنيا وغاية مرادي
من يوم شد صويحبي من بلادي=عليه جاوبت الحمامه بالأصوات
الجيم.. جاني من عشيري كلامي=ولا لقينا من يرد السلامي
عليه زرع القلب هايف وضامي=مالي جدا كود البكا والتنهات
أنهت على مافاتني من زماني=يوم الحبيّب زارني في مكاني
وراي ماخذت القضـا يوم جاني=توي دريت البيض فـيـهّن غرات
الخاء.. خليلي صار مني قريبي=جعلي نصيبٍ له وهو من نصيبي
ودي أواجه نور عيني حبيبي=مير الوحيد أزهيد مافيه نوهات
نوهات نوهاتٍ غدت من غثاالبال=طول النهار مسيم عمّال بطـّال
وأنا ترجا كل حولٍ إليا حال=دنياك هذي ياريّش العين نشبات
الدال.. دامي مامسكت الذوايب=لوّ قيل طيّب قلت ماني بطايب
هاتوا ستاد القبر..دنوا نصايب=دنو دوات الحبر بكتب سجلات
سجلات أريد أكتب بها ليّ وصيّه=عمري غدا ياويل أهلي عليّه
قولوا لصاف الزين ياقف عليّه=ياكود يعطف وتحسف لما فات
الذال.. ذالي عنه مدة ليالي=أن قيل سالي قلت ماني بسالي
والله مايطري على شف بالي=ألا أنت ياراع الثمان الرهيفات
رهيفات فيهن للموّلع طرابه=مجمول مدلولٍ ولابه طنابه
ياليت من يدخل معه في ثيابه=وسج أنا وياه بالعمر سجات
الزاء..زماني شفت منه الهوايل=لاصار حظي بالغنادير مايل
الزين لوّ نترك قصيرٍ وطايل=لاشك وين العقل هيهات هيهات
هيهات لوّ بالعقل يادب لبـه=ماكان يتبع واحدٍ مايحبه
لاصار قولي له خريطٍ بدبه=وش لك بشوفه بالعيون المشقات
السين سلمت الدراهم وعيّا=واللي بغيت من الغظي ماتهيّا
يقول والله لوّ تحب الثريا=خذني على السنه تشوف الطرابات
طرابات ينسّنك جميع الدروبي=أغديك في تالي حياتك تتوبي
وجعل مقرك بين جلدي وثوبي=حتــى تشوف البيض فيهّن جنات
الشين.. شاب الراس ياعذب الأنياب=واللي برجوى توبةٍ ذاك قد تاب؟
إليا بدالي حاجةٍٍ فافتح الباب=يرحمني اللي عالمٍ بالخفيات
يرحمني أني فيك يازين مفتون=من حبك أسهر والخلايق ينامون
ألهيتني عن مذهب اللي يصلون=ماعاد أميّز لو قران التحيات
الصاد..صيدي يوم ألايم غريمي=شفقٍ على الحبه ولمس البريمي
ماهوب صيدي قلّةٍٍ بالحريمي=لاشك كلٍ له مع الناس مشهات
مشهات مشهاتي ظبيٍٍّ فريدي=حب العرب ينقص وحبه يزيدي
لاشفت ذاك الزين هو يوم عيدي=تصبح بساتين الضماير مريفات
الضاد...ضدي حال بيني وبينه=يقول هذا صانعٍ وشتبينه
عسـى العما يبلاه بصبيّ عينه=سهر ولا يمرح من الليل ساعات
ساعات جعله مايشوف الجدارا=ولا يعرف الليل هوّ والنهارا
عساه يوم البعث يبعث حمارا=وحملونه حمل الأسراف سيّات
الظاء.. ظمان ان من توّلع بالأثنين=لابد تترك عشرته يامسيكين
ماينجمّع وسط المرابط حصانين=يجي لهن حوسٍ ودوسٍ وصقلات
صقلات يصقل يوم دنوّا طعامه=شفقٍ على العيشه ولاهي بحامه
أسمع جوابي ياهبيل الفدامه=إليا جمعت الحصل فالحصن خطرات
الطاء..طويت الياس والسد باحي=ماعاد ليّ شفٍ بظبي البراحي
لعلها هفّت خفوق الجناحي=اللي سبوقه فوق رجله مطوّات
مطوات طار وراح في يوم هبّه=راعيه لوّ زر اللوا ماينبه
يتلا فروخٍٍ للحباري غدت به=يبغا العشا مابين فخذٍ وثندات
العين.. عن من ينقل الهرج حذراك=تراك كنّك ناقلٍ داك برداك
إليا سمع له هرجةٍ من حكاياك=يحطها كبر القصور المبنات
مبنّات يبني مثل خشم الغرابه=ويكرد المشروب عقب الطرابه
وهو يشابه بومةٍ في خرابه=لاناقلٍ هرجه ولا كفو هرجات
الغين.. غاب العقل بأول شبابي=وأدميت من تلعات الأرقاب نابي
واليوم شاب الراس والكيف طابي=ماني على الفيات كثير الحسوفات
حسوفات لاتندم على اللي غدا منك=أيضا ولا تفرح على اللي يجي منك
مادراك لوّ موجب سبب صدته عنك=ناهيك وليّ العرش رب السماوات
الفاء..فوادك لاتوليه حساد=وحذر يجي لك مع هل السوّ منعاد
اضحك وخلك عن جميع العرب صاد=ثم اعتبر بالذيب يضوي بغارات
غرات يضويها وهم مادروبه=واللي يوقف بالحراوي هقوبه
كم واحدٍ وقف ولا قظا ذنوبه=يكسر إليا شاف اللحم كنه أحدات
القاف..قل للي يزيد النواميس=اللي شفوقٍٍ للهوى يرخص الكيس
إليا بذلت النفس والكيس وبليس=يطيح ناسٍ يدعون الدايانات
بدايات صارت للخلايق علاجه=يلقا بها راع الهوى قضي حاجه
إليا بذلك الحب جتك الدجاجه=حاضت وباضت لوّ تبي عشر بيضات
الكاف كن السد في كل الأحوال=وحفظ لسانك لايقولون ذا قال
حتـّى تجي محبوب محسوب رجال=لاجيت بالمجلس نواظرك صقلات
صقلات لاتامن من اللي يحاكيك=وهو عدوّك تحسب انه يحاكيك
ياذيب كان الله على الرشد هاديك=أكتب كلامي بالضلوع المحنات
والام..ليت العمر ينكس لحلّه=قيمة ثلاثين السنه في محله
الرجل قبل الشيب واحلو دله=وأن لاح فيه الشيب مافيه لذات
مافيه لذاتٍ ولايقبلونه=لوّ حط له ردنٍٍ وكحل عيونه
أهل الهوى عقب الغلا يكرهونه=لو كان صافاهم على فايتٍ فات
والميم..مامثلي من الناس جرب=ولا مثلي أحدٍ في زمانه تطرب
لاويت صاف اللون فوق المضرب=كن العدو عني عيونه مداوات
مداوات ماودي يجي له عباره=واللي يجنب عنك وش لك بكاره
الحذر ماياطا بوسط الخباره=لازم يجي فيها عقارب وحيّات
والنون.. نام الحظ مافيه حيله=عيّا يباريني أنا ازريت أشيله
من يوم فارقني عريض الجديله=قامت تكسر في حشا الصدر عبرات
عبرات ضاقت بي حنايا ضلوعي=عليك ياخلي حسين الطبوعي
دين الوجع ماقط كفن دموعي=دايم عيوني في مراعاك سهرات
الواو.. ويل أهل الهوى من هواهم=أن كان مافيني بحالي وطاهم
كم ليلةٍ يصبح غبيبٍ عشاهم=إلاّ لقيماتٍ على الكبد مرات
مرّات لين ابرد من الترف شفي=ووسده عضدي وزندي وكفي
وأشهر بحبه باينٍٍ ومتخفي=ثمٍ يجي للزاد والشر لذات
والهاء .. هواى العاشره يافطيني=والسابعه ياللي تعرف الرطيني
كاميه ماودي لضدي يبيني=والخامسه ماتنحصا عداد الأميات؟
أميات مات القلب كم كثر همي=أشكي عليك الحال ياولد عمي
أنته عظيدي وأنت لحمي ودمي=ترضاه يجفاني ولاني بمجفات
الياء.. يولّع في ضميري حريقه=أذكر شرابي من قراطيع ريقه
وهز نبنوب الغصون الوريقه=في عرض بستانٍٍ روايا ولدنات
لدنات نسناس الهبايب يديره=واللي تولّع به حباله قصيره
ماضن يبرد واهجٍ في ضميره=ألا على سلسال ذيك الشفيّات

الموضوع الأصلي: ألفية أبن عمار || الكاتب: أبومحمد || المصدر: منتدى الجبلان الرسمي

المصدر: ::منتدى الجبلان الرسمي::