ياسعود ( م ) بالوضع ياسعود تغيير
صاح الجنوب وضاق لاجله شماله
ياسعود ماني بخير لو قلت لك خير
هذا الزمن عيبه يبكي رجاله
هذا الزمن مايرحم صغير وكبير
ياكم عود(ن) دم عينه عياله
وانا كتبت اللي كتبته وانا صير
شاعر يترجم مايشوف بجزاله
سقت الركايب علها تارد البير
وتروي غليل اللي دموعه هماله
مثل السحايب فوق خده مزابير
وحد الثمال الحزن حد الثماله
والطير لو يكفخ عجز يكفخ الطير
وش حيلته والموت نوخ جماله
بسبة اللي ساق عمره على الغير
ويجني ثمار العمر ، شر وجهاله
شايب وراسه شاب مايقوي السير
وحتى عظامه ماتشيله بحاله
والغير ، لو تدرون في وضعهم غير
هم الضنا يـوم الضنا راس ماله
شايب وصاح بعالي الصوت ويشير
الله حسيب اللي ظلم في حلاله
جيت ولقيت الدمع في عينه يحير
وتحكي عيونه قبـل يحكي فعاله
قال القطاعه ، دابر الشر ويغير
هـذه نتائج مازرعت بخماله
امي وابوي ، ومالقيته وانا صغير
كله نسيته ، بالشباب وكماله
قاطع وقلبي صد عن وصلهم مير
شفت الجزاء واللي لقيت بوصاله
ياهيه ، كانك تفهم العلم لاتصير
مثلي وتلقاء ماحصدت بلياله
ثنتين وافهم ما اقوله بتبصير
امك وابوك ، اللي عليهم جماله
ومسحت انا دموعه بليا معاذير
ومفطور انا قلبي من الي جراله
انشهد(ن) مايعفي الذنب تبـرير
لا والذي ارسل علينا الرساله
ياعم والدنيا مصايب وتعبير
والله كريم ، ويعفي اللي عناله
قد قالها في محكم القول تفسير
من تاب تاب الله عليه وهداله
ياسعود والاشعار عبر وتفاكير
و( العاق ) والله لاتقطع حباله
ياسعود والي صار في غيره يصير
وياكم عود(ن) دم عينه عياله