يعين الله يا دنيا تسوق ايامها الاحزان=يعين الله وانتي مثل قفل ضاع مفتاحه
يعين الله وجروحي لها في كل وقت شان=كذوب الي يقول ان الزمن بيداوي جراحه
سقا الله يوم انا يمه غرير يزعج الجيران=سقا الله يوم انا طفل يصج البيت بصياحه
سقا الله يوم كان اقصى طموحي لعبة الدنان=نهاية يومي المغرب واخاف الليل واشباحه
سقا الله يوم انا البس بشت ابوي وثوبه القيطان=واقلد كل شي فيه حكيه.. جده... ومزاحه
واشيل المسبحه مثله ليا هوجس وهو سرحان=بيشعر .. واحسب ان الي عطاه الشعر مسباحه
سقا الله بيتنا ذاك البسيط مشقق الجدران=شجاع يهزم الغدرا بقنديله ومصباحه
تكحلنا القناعه لا طمع لا هم لا حرمان=واذا جا الليل تكفينا ثلاث اخوان طراحه
جميع الذكريات الي غدت في قفرة النسيان=تحاكي حلوها عبره بموق العين سباحه
خذتني غربة عنوانها غربه بلا عنوان=ابي عقب التعب راحه لقا فيني التعب راحه
رجعت اليوم مثل الي رجع عقب القنص خسران=غدا طيره وجا يسحب سلوقيه وملواحه
قصيدة ما بعد مرة ابال مساعد وضيدان=هواجس ابدوي هايم في عشق فلاحه
وروح تايبه كانت تبي لذنوبها غفران=خطاي اني كتمت اسرارها بعيون بواحه
تقولين المطر ماهوب يمه دايم هتان=اجل معذور قلبآ في همومه ضاعت افراحه
انا يمه غلطت ولاني اول واحد غلطان=ابونا ادم من الجنه خرج باسباب تفاحه
خذلك الوقت فيني ما خذلتك يا اعز انسان=وش الدبره .؟ وحظي صار قفل ضاع مفتاحه