قصص البدو مع الجن وقصائدهم

قصص البدو مع الجن وقصائدهم

السلام عليكم و رحمة الله وبركاته

طبعا ماحد عنده شك في ان الدنيا مليئة بالعجائب ... ولله في خلقه شئون ... وان مما يثير العجب لدى الانسان هو الكلام عن الغائب والمجهول ... فتكثر الاساطير والاقوال الكثيرة حول ذلك.
والجن من أغرب مخلوقات الله سبحانه وتعالى ... بل يعتبر مصدر الخوف لدى بعض الناس ... مع العلم ان الجني يبادله نفس الشعور في الخوف .
والمطلع على روايات العوام يجد العجب العجاب من تلك القصص ... ولكن هل نصدقها أم نكذبها ... لأننا لم نراها !!!
على العموم الجن مخلوق من مخلوقات الله ... وهو مكلف ... ويجب الإيمان بوجوده ... لأن الشريعة الاسلامية تقر بوجود الجن ... وقد تكلم القرآن الكريم عنهم والسيرة النبوية أيضا ... بل ان الاحاديث الشريفة ذكرت أصنافهم ... وانهم ثلاثة اصناف ... فصنف لهم أجنحة يطيرون بها في الهواء ... وصنف حيات وكلاب ... وصنف يحلون ويظعنون
وبما أن المجتمع مليء بالكلام عن الجن وقصصهم ... وأشعارهم وأمثالهم ... فإنه يتحتم علينا عدم إهمال تلك الروايات والاساطير ... لأن فيها إثراء للأدب الشعبي.

هذه القصة جرت على احدى القبائل العربية في الزمن السابق (قبل حوالي مائة وعشرين عام او اكثر تقريبا) ... اختفى رجل من قبيلتهم ولا يدرون وين مكانه ... بحثوا عنه في كل مكان ولا لقوا له اثر ... وبعد مده ... قرابة الشهر او الشهرين ... كان واحد من هذي القبيلة ابن عم للمفقود مفلّيٍ اباعرة في الخلا ... واسمه علي ... وكان علي هذا قاهر(ن) المقهور ... وقريب منه رضم كبار ( صخور كبيرة) ... ويوم شاف البل رتعت وبعضها برّك ... انسدح وحط راسه على الارض ... وما أثاره إلا صوت رجل يغني ... الا يوم فزع الرجال من غطته... وقام ينصت لصوت المغني ... والصوت مهوب غريب عنه ... كنه صوت ولد عمه المفقود ... المهم تثبت الرجال منه ... وكان الصوت يجي من يم الرضم ... قام يتوحي في قصيدته اللي يغنيها ... لينه يقصده بالكلام ويقول:

يا علي صحت بالصوت العليّ ****يا علـي لا تحمّلنـي مـلام
يا علي لا بليـت بمقعـدي ****بين صدعين في غدرىً ظلام
آآه يا ونتي عند ولـد التنـي ****عند ثـلاّم مـردوع الوشـام

قام علي مسرع وركب الذلول ... وتوجه يم العرب يصيح ... انتبهوا الناس له ... وجوه من كل مكان ... أنت علامك يا ولد ... أباعرك اخذتها القوم ... قال انا اوحيت حس فلان ( المفقود) يغني في الرضم ... ويقول كذا وكذا
فزعوا العالم له وقاموا يفتشون الرضم حصاة حصاة ... ويوم جوا عند هاك الصدع الكبير بين رضمتين ... لقوا الرجال المفقود ميت... فعلاً بين صدعين في غدرى ظلام... لكن منهو اللي قال القصيده اللي سمعها على والرجال اثرهم لقوه ميت من مبطي .
طبعا الجماعه قاموا يتفهمون القصيدة اللي حفظها علي واكتشفوا ان سبب قتله كان عند عرض اخت (ولد التني) ... وكان ولد التني هذا يعرفونه من اقصى الجماعة ... وقاموا وطلبوا منه الدية ... ودفعها لهم ولد التني.

واول بيت كان واضح
وثاني بيت كان يقصد فيه ان الله لا يبلاك بمكاني اللي انا فيه ووضح مكانه انه بين صدعين وفي ظلام دامس
والبيت الثالث وضح فيه ان اللي ذبحه ولد التني بسبب عرض اخته وهذا ما وضح لنا في الشطر الثاني
من البيت الثالث

واعتقد سبب القصيده توضيح لدفنه اولا وثانيا للاخذ بثاره

(الجني العاشق)

هذي القصة قريبة نسبياً .... يعني قبل حوالي ثلاثين او اربعين سنه.... كان فيه بنت مع اهلها ... وتسرح في الغنم .... وعلى هذي الحالة طول الزمان ... وفي يوم من الايام ... يوم ضوت الغنم على اهلها ... البنت ما ضوت معها ... راحوا اهلها يدورونها في الليل ... يا الله اني دخيلك من الهجاد ... وما لقوها ... ويوم اصبح الصبح وهم يروحون يدورونها في مفلا الغنم امس ... ويلقونها طايحة على الارض مريضة ... ويشيلونها ويودونها للبيت ... ويوم جت في البيت وهم يعطونها عيشة .... وتاكل ... وهي تقوم تسولف لين ما بها غير العافية... خذت لها أيام على هالحال ... ولكنها مرضت من جديد ... واهلها ما يدرون وش فيها ... راحوا يعالجونها في كل مكان ... وما لقوا لها علاج .
جاهم واحد من ربعهم وقال (ترى فيه واحد في الكويت يعالج مثل هالحالات ) . عزموا اهلها انهم يعالجونها في الكويت ... وقالوا لواحد من اخوانها ... يا فلان اسرح في الغنم ... وحنا نبي نروح نعالج اختك في الكويت ... طبعا هي تركت السرحة من زمان بسبب وجعها ... ويوم راحوا للكويت ... واخوها سارح في الغنم ... وكان قريب من احد الجبال الصغيرة ... سمع له صوت واحد يغني ورى الضلع ويقول:

هذي مفالـي خـويٍ لـي ****(........................)
اللـي قرونـه شعافيـلـي ****وامضللاته عـن الشمسـي
وخويتماتـه تفـاريـزي ****ومفرقاتٍ علـى الخمسـي

ويوم رجعوا من الكويت علمهم باللي سمع ... واكتشفوا ان اللي فيها جني ... وراحوا يعالجونها عند مطوع ... واخرج الجني منها ... وشفاها الله.

في احد السنين تأخر الرجع عن نجد ... والشمال ربّع ... وأحالوا اهل نجد للشمال قريب من حايل ... يبون الحيا ... وربعوا وعينوا من الله خير ... وكان وحده من حريمهم اسمها هدابة ... أصابها حمى ... وماتت ... الله يرحمها ... قاموا وصلّوا عليها وقبروها في صاح ضلع كان قريب منهم ... وراحوا وخلوها ... وجاء القيض ويبس العشب ... وكلٍ رجع لديرته.
مرت السنين والسنين على هاك الربيع ... وفي يوم من الايام كان لجماعة هدابة غرض في حايل ... عند ابن مساعد ... راحوا له ويوم قضوا غرضهم نكسوا راجعين ... وهم سارين في اليل انهكهم التعب ... وقالوا خلونا نمرح ونريّح ركايبنا ... ويوم نوخوا وهم يبطّون النار ويسوون عشاهم ... ويوم تعشوا وهم يتسدحون ... ذابحهم التعب ... بس الرياجيل ما رقدوا ... لأنه ايقضهم صوت حرمة تغني بأعلى صوتها في راس الضلع في الليل ... والصوت بعد مهوب غريب عليهم ... قاموا يتوحون فيها لينها تقول:

شيلوا على الاملح بقايـا زهابـه ******جملكم اللي فـالعشايـر تهـدّون
ذيله على العرقوب غادٍ اخضابـه ******وَقْم الرباع او السديس او بعد دون
قولوا هـذا قـولٍ تقولـه هدابـة ******والاجنبي بديار الاجناب مشحون

وكان المقصود من الابيات انكم تفتحون القبر وتاخذوني على الجمل الموصوف في الابيات
وتدفنوني عند ربعي لان الاجنبي المدفون في ديار غير ديار ربعه ماحدن ذاكره بعكس وجوده حول جماعته

ويوم اصبح الصبح اكتشفوا انهم جنب امراحهم هاك السنه اللي ربعوا فيها يم حايل ... وان الضلع اللي كانت تغني على راسه الحرمة هو الضلع اللي قبروا هدابة فيه.

ومن الامثال اللي جرت على لسان الجن
( يا الله اقلعها عنا لو حذفت حصاة)

هذا المثل مثل معروف عند العامة ... وقصته ان فيه رجال له ابن وبنت ... قدر الله وماتت البنت ... وقام الابو والابن يحفرون القبر ... ومن العصر لين المغرب عجزوا يحفرون شي ... لأن الارض صلبة ... ولا يدرون وش سبب صلابة الارض ... لأنهم يحفرون القبر في ارض هشه ولكن كأنهم يحفرون على الصفى ... وامسى الليل وهم ما سوو شي ... صابهم الارهاق والتعب مع الحزن ... وجلس كل واحد لحاله ... حاطٍٍ يدينه على عيونه من التعب ... ولا افزعهم الا صوت رجل غليظ يقول ( يا الله اقلعها عنا لو حذفة حصاة) ... قام الابو واخذ له حصاة وحذفها .... ويوم وقعت في الارض قال لولده ... تعال نبا نحفر هناك عند مطيح الحصاة ... وفعلا حفروا القبر وتيسرت امورهم ... وهم قبل كانوا يحفرون فوق بيت جني .... بغوا يشقون السطح على الجني الله يهديهم.

( انت وش عليك من ذيبي ياكلني ولا ما ياكلني)
( الجني ليا شاف الذيب ما عاد تبلعه الارض )

وهذي المقوله تقول قصتها انه كان راعي ابل معشيٍ اباعرة العصر ... على فرسه ... ومعه العبد يقهر المقهور ... ويوم جاء العير عصير قال للعبد ... يا فلان حط عينك على البل ...انا ابا اروح ادور لها مبيتٍ زين ... مشى من عند العبد على حصانه ... يدور لاباعره مكان دمث ( مراح طيب ) يبرك فيه البل في الليل ... ويوم رقى هاك الزبارة ... سمع له صوت طفل يصيح ( يستنجد) .... يوم عاين في اسفل الخبة ... لين فيه عواشز (العوسج) ... والورع يدور حولهن ويصيح ... وفيه ذيبٍ يراوغه مع العواشز ( كلما راح الذيب في جهه راح الورع في الجهه الاخرى) ... صاح الرجال على الذيب ( الخلا ... الخلا ) وهذب الحصان يمه ... والذيب يوم سمع صوت الرجال هج ... ويوم اقبل الرجال على الورع والعواشز ... قال للورع ... هو بغا ياكلك ... قال الورع ... ( انت وش عليك من ذيبي ياكلني ولا ما ياكلني ) ... ويوم قرب منه ليا هو مهوب ورع طبيعي ... شوشته كلها شوك ... وعيونه مثل الصدوع من فوق لتحت ... وقال له ... الله يجعله ياكلك ولا يخلي لك شريدة ... ويوم اقفى عنه ... ووصل راس الزبارة اللي سمعه منها اول مرة صوت الورع ... سمعه يصيح مره ثانيه ... ويوم التفت يمه لين ذيبه يراوغه بعد ... بس هالمرة ما رجع له ... راح وخلاه في حال سبيله هو وذيبه ... ويوم جاء النهار الثاني ... والبل تمر العواشز الجني ... ويمر الرجال على العواشز ... ويلقى مفارس الذيب للجني ... وفي المكان فيه دم بسيط ... وكان الذيب حافر له زرب صغير في طرف احدى العواشز ... عاد الرجال فسر محفر الذيب للزريب ... ان الجني ( الورع) كان ناوي يدخل في بطن الارض... بس الذيب صاده قبل تبلعه الرقة ... والبادية يقولون ان ( الجني ليا شاف الذيب ما عاد تبلعه الارض ) ... ومن رواياتهم عن الذيب يقولون انه سبعة ليال يتعشى من البهايم وخشاش الارض ... وسبعة ليال يتعشى من الجن .وسبعة ليال من الجميم الايبد
وسلامتكم

منقووووله

الموضوع الأصلي: قصص البدو مع الجن وقصائدهم || الكاتب: شاب ضوه || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

قصص تحمل الكثير من المعاني
يعطيك العافية ولاهنت

شاب ضــوه , , ,

لاهنت لاهنت . . . على القصص الجميله جدااا بارك الله فيك وطاب منقولك وامتعتنا بالقصص روـعـه , , ,

اشكرك على القصص الجميله , , ,

تقبل مروري وفائق الاحترام والتقدير , , ,

تم تقييم الموضوع , , ,

الله يعطيك العافيه ولاهنننننننننننننننننننننت على القصص الجميلة

الله يعطيك العاااافيه شاب ضوه
مميز بختيارك كعاااادتك
لاهنت لاهنت لاهنت

أخواني فهد عيد ومحمد بن حلبيد واحمد اللويمي وفهد اللويمي

شكرا لحضوركم ومروركم العطر وتعليقكم الرائع

لاهنت عالنقل

لأهـنت على هـ آلقصص آلي فيهأ آلكـثير من آلمعلومآت وعسسى ربـي يـحفظ جميع مسلم من جميع جـني

تقـبل مروري

اخواني محمد بن جبرين وسلطان بن لامي

حياكم الله واشكركم على الحضور والتعليق


شكرا لكم