تسوقني الخطوه ولا ادري على وين=وتلعبي الدنيا على كيف الايام
اقصى الخطا انك تفهم مجانين=واقصى الصواب انك تفكر القدام
من خلقت الدنيا بها الزين وشين=ودايم بها الطيب يعاني وينضام
مايقهر الرجال اكثر من ثنين=دين(ن)وضيم(ن) لهجعوا الخلق مانام
ياصاح انا ماني مع الناس مسكين=قضى حياته مثل ماتعيش الانعام
لامن بغيت الشي لو قاسي يلين=غصب(ن) على شارب حسود(ن) ونمام
والمرجله لوهي سباق(ن) وتثمين=لا مارضينا بغير فوز(ن) بالوسام
الطيب يقدر على الراس والعين=والعفن خله ضايع(ن) وسط الاوهام
ماكنت احسب ان البشر به شياطين=وللمصلحه توطى الاخوه بالاقدام
الراس شاب ولا وصلنا الثلاثين=من كثر ماشفنا من اهوال الايام
والجرح دامي من طعون السكاكين=يسكن صحاري الجوف بانيله اخيام
والناس بالدنيا كثير وملايين=والرابح اللي منغرس فيه الاسلام
لاضاقت الدنيا رفعنا باليدين=نرجى عفو رب(ن) رحيم(ن) وعلام
لا ماكتبنا الشعر نمدح سلاطين=والبعض نحني لفعلهم روس الاقلام
نزرع رياض الحب ورد وبساتين=ينزل بها الطيب على عرش الاكرام
من اول الدنيا الى الفين واثنين=الخير والشر بعداة وخصام
والفعل غير الحكي كل(ن) به يزين=والبحر مايهلك خبير وعوام
اقوى سلاح الردع حقر الملاعين=وكلمة افا تحكم على الطيب اعدام

الموضوع الأصلي: كـلـمـة أفـــا .. || الكاتب: (نمر)بن(جبلان) || المصدر: منتدى الجبلان الرسمي

المصدر: ::منتدى الجبلان الرسمي::